Nokia oo shaqaale badan shaqada ka eryeysa magaalooyinka Salo iyo Oulu

Shirkada sameysa teleefanada gacanta ee Nokia ayaa dhimeysa shaqaalaheeda tiro gaareysa 10 000, shaqaalahaas oo ah kuwo ka shaqeeya warshadaha kala duwan ey shirkada ku leedahay dalalka caalamka.

Nokia ayaa shaqada ka eryeysa shaqaale dhan 3700 qof dalka Finland gudaheeda, waa markii ugu horeysay tiro shaqaale oo intaas la eg halmar shaqada laga eryo dalka Finland.

Dowlada Finland oo ugu horeeyo madaxweynaha Sauli Niinistö ayaa walaac ka muujiyay xaalada lasoo daristay shirkada Nokia taasoo saameyn xoog badan ku leh dhaqaalaha dalka Finland. Magaalada Salo iyo Oulu ayey saameyn weyn ku yeelatay warka shirkada Nokia, warshada Salo ayaa gabi ahaan albaabka leysugu laabi doono dhowaan, warshadaas oo shaqada ka joojineyso 850 qof. Sidoo kale magaalada Oulu ayaa 500 oo shaqaale shirkada Nokia shaqada ka eryeysaa.

Shirkada Nokia ayaa ku macneysay shaqaale dhimista mid ku saleysan shirkada oo dhimeysa qarashaadkeeda.
Qorshaha shirkada ayaa ah iney qarashkeeda dhinto 1.6 miljardi inta aan la gaarin sanadka 2014ka.